Qırımda 2025 senesi boş ayda Qırımtatar resurs merkezi eñ azından 24 apiske alınuv, 10 yaqalanuv, 5 tintüv ve adaletli mahkeme aqqınıñ 31 bozuluvını qayd etti. Bu aqta malümat QRM-nıñ saytında yerleşken maruzada bar.
Umumen boş ayda insan aqları bozulmasınıñ eñ azından 86 adisesi qayd etildi.
QRM malümatına köre, 24 apisten 9-ı qırımtatarlarnen bağlı edi. Bundan ğayrı, QRM 10 sorğu, sorav ve "subet" qayd etti, olardan 4-ü qırımtatarlarğa nisbeten keçirildi.
QRM-nde qayd ettiler ki, 10 yaqalanğan kişiden 4-ü qırımtatarlarğa nisbeten yapıldı. Bundan ğayrı, 5 tintüv qayd etildi, üçü qırımtatar halqınıñ vekillerine ait edi.
Adaletli mahkeme aqqı bozulğan 31 adiseden 15-i qırımtatarlarnen bağlı edi. Bundan ğayrı, boş ayda 4 mabüsniñ etap etilmesi qayd etildi, olardan biri qırımtatar. RF akimiyeti Gennadiy Osmak, Sergey Lihomanov, Seyran Asanov ve Aleksandr Sizikovnı etap etti. Eki Qırımlı mabüs Ayder Saledinov ve Seyran Saliyev ŞİZO-da ya SİZO-da tutuldı.
İlk küz ayınıñ soñunda Qırımtatar resurs merkezi, Qırım ilhaqından soñ Rusiye akimiyeti tarafından siyasiy sebeplerden taqip etilgen Qırımlılarnıñ sayısı artqanını bildirgen edi. Şimdilik, QRM-nıñ esaplarına köre, olarnıñ sayısı 447 insan oldı, olardan 258 qırımtatardır.
